بداياتي مع التسوق الإلكتروني
يسعد صباحكم \ مسائكم جميعاً ، هنا راح أسولف لكم 🙈
خلوني أحاول أسترجع ذاكرتي معكم وكيف بديت أشتري عن طريق الإنترنت 😅
أتذكر إذا ما خانتني ذاكرتي من أيام الثانوي (ما أعرف أي مرحلة) كنت أحب أتصفح موقع الإقلاع خاصة قسم (سوق الإقلاع) ، مرة كنت مفتونة فيه لدرجة يومياً لازم أسيَّر عليه 😅
وإذا أعجبني شي طلبته وخليت ابوي الله يحفظه يحول المبلغ 😂 ،وأنبسط مرره إذا وصلني البوكس .
من هذاك الوقت ما كنت أخاف يقصون علي التجار أو يخدعوني وكان عندي روح مغامرة وأستمتع بهذا الشيء والأهم أهلي ما كانوا ممانعين الموضوع لأنه ذاك الوقت مو مثل الآن 🙅.
شوي شوي صرت أتصفح مواقع التسوق مثل (asos , amazon وغيرها) بس وقتها كنت مستصعبة موضوع الطلب لدرجة ما بحثت كيف يطلبون الناس😽
لما دخلت الجامعة صرت أتعامل مع وسطاء يطلبون لي من المواقع ، كان ذاك الوقت مستحيل تلقين وسيط عمولته ٤٠ ريال ، كلها من ١٥٠ وطالع 😑 أوقات أتراجع عن الطلب لأن قيمة الطلب ممكن تساوي العمولة 😕.
على كلٍ ، أتذكر أعجبتني شنطة وأنا بثاني جامعة وخلاص مسكت معاي أطلبها أنا بدون وسيط ، ووقتها ما معاي فيزا لذلك استنجدت بالوالد ، ولعل الوالد ذيك الفترة مشغول حاول يطلب لي ولما ما ضبط قال دوري لك وسيط يطلب لك وأنا أدفع العمولة (فكيني من إزعاجك 😂) ، وقتها مسكت معاي ما يطلبها لي أحد لذلك إستنجدت بأخوي كان ببريطانيا ومن هناك طلبها لي وشحنها .
( طبعاً الفائدة اللي طلعت بها فقط الشنطة ، لا أنا عرفت كيف يطلبون الناس من المواقع ولا عرفت إني أحتاج أطلع فيزا ولا شي🙍).
وجلست سنتين تقريبا (مشغله) اخواني إذا بغيت من أمازون أرسلت لأخوي اللي بأمريكا وإذا بغيت من مواقع ببريطانيا أرسلت لأخوي اللي ببريطانيا وهكذا😫😂.
على آخر سنة جامعية حسيت إني اللي جالسة أسويه عيب وإني أشغلت اخواني عن دراستهم(بدري😅) ، لذلك إستفقت وجلست أبحث عن طريقة الطلب بالتفصيل ، طلع الموضوع سهل ! كل ما بالأمر (فيزا+فلوس) 😻
وقتها بديت أجرب شوي شوي ، جربت مواقع كثيرة ، غامرت كثير ، الأهم تركت طلعة السوق والبحث عن ملابس وإلا أي شغله ثانية ، صرت أطلع أتمشى وأتقهوى وأرجع للبيت أتسوق😻
عالم التسوق الإلكتروني عالم عظيم وعميق ، ممتع وله لذة غير التسوق العادي ، شعور إستلامك البوكس وفتحه حاجة ثاني😂😍
انبسط إذا أي أحد من أهلي وأقاربي وصاحباتي قال لي أبغى كذا إطلبي لي ، أو أبغى الشغلة الفلانية إبحثي لي عنها.
فعلاً الموضوع بالنسبة لي متعة أكثر من أي شي ثاني🙊
أي شي يخطر على بالي أبحث عنه ، ناهيك عن فرق الأسعار(غالباً) ، غير كذا مافيه شي تبحثين عنه إلا يكون موجود عكس الأسواق ممكن تاحذين جولة يوم كامل وما تطلعين بنتيجة .
ولا أخفيكم أخوي اللي بأمريكا كل مره آكلمه يسألني (ماتبغين أطلب لك شي من هنا!إذا محتاجة لا تستحين)😹😻
شعور إنك تطلبين لنفسك غير لما تخلين أحد يطلب لك ، تقدرين تغيرين قرارك ألف مره وأنتي مرتاحة وتعدلين وتبدلين بالطلب على راحتك بعكس لو أحد ثاني بيطلب لك الموضوع يكون محرج ومزعج شوي .
وبس والله هذي قصتي مع التسوق الإلكتروني ، حاولوا وجربوا ماراح تندمون 😉♡
ليست هناك تعليقات:
إرسال تعليق